Në vijim të Memorandumit të mirëkuptimit ndërmjet Agjencisë Kombëtare të Burimeve Natyrore (AKBN) dhe Komisionit të Pavarur për Miniera dhe Minerale (KPMM), një grup i përbashkët përfaqësuesish nga AKBN&KPMM, vizituan investimet e mëdha të bëra nga kompania TETE Albania&Mining sh.a , në minierën e fabrikën e Spaçit, investime në kërkim të mineralit të bakrit dhe zinkut.
Grupi i përfaqësuesve nga AKBN i përbërë nga Drejtori i Drejtorisë Minerare, Drejtore e Drejtorisë së Zhvillimit  Strategjik dhe Dëgjesave me Publikun, njëkohësisht Koordinatorja e Bashkëqeverisjes për Biznesin, shefi i Sektorit në Drejtorinë Minerare, përfaqësuesët e KPMM së Kosovës, si edhe me pjesëmarrjen e Drejtorit të Minierave në Ministrinë e Infrastrukturës dhe Energjetikës, u njohën nga afër me investimet në projekte, teknologjitë, makineritë e avancuara, infrastrukturën në minierën dhe fabrikën e pasurimit të bakrit në Spaç. Këto investime u prezantuan nga Kryetari i Bordit të TETE Albania&Mining sh.a, inxh. Bertan H.Berkpinar,dhe stafi shoqërues i inxhinierëve.
Kompania TETE Albania&Mining sh.a është një ndër kompanitë më prestigjoze të investimeve prej 20 vitesh në fushën minerare në kërkim të bakrit dhe zinkut në Shqipëri, dhe një investim të tillë në minierën dhe fabrikën e pasurimit të Spaçit e ka bërë për prodhimin e koncentratit të bakrit për eksportim jashtë vendit.
Miniera e Spaçit ka edhe një veçanti me elementë historikë, pasi ka qenë minierë e ndërtuar në afërsi të burgut të Spaçit në kohën e diktaturës komuniste, ku të burgosurit politikë të asaj periudhe detyroheshin të punonin në minierën e Spaçit në kushte ç’njerëzore.
Ishte impresionuese për grupin e vizitorëve të shihte nga afër sesi kishte ndryshuar miniera e Spaçit, nga një minierë në kushte të rënda pune në kohën e diktaturës komuniste, në një minierë të modernizuar dhe me kushte moderne pune.