Agjencia Kombëtare e Burimeve Natyrore (AKBN) mori pjesë në tryezën e rrumbullakët me temë “Triple-Helix Circular Economy Synergies”, një platformë inovative bashkëpunimi midis institucioneve shtetërore, sektorit privat dhe akademisë. Aktiviteti u organizua në kuadër të projektit “Research Expertise from the Academic Diaspora” (READ), me mbështetjen e Fondacionit Shqiptaro-Amerikan për Zhvillim (AADF).

Kjo tryezë mblodhi aktorë të rëndësishëm nga fusha të ndryshme, përfshirë përfaqësues të institucioneve shtetërore, sektorit privat, akademikë vendas dhe nga diaspora, si dhe organizata joqeveritare, me synimin për të promovuar praktikat e qëndrueshme dhe inovative në ekonominë qarkulluese.

Z. Sofjan Jaupaj, Zv. Ministri i Turizmit dhe Mjedisit, theksoi angazhimin e Shqipërisë për integrimin në BE dhe rëndësinë e kapitullit 27, duke nënvizuar rolin e arsimit dhe bashkëpunimit ndërmjet aktorëve për të ndihmuar tranzicionin e gjelbër. AKBN, si një nga aktorët kyç, shprehu përkushtimin e saj për të mbështetur iniciativat që synojnë një qasje më të gjelbër dhe inovative për zhvillimin ekonomik dhe mjedisor.

Diskutimet u përqendruan në tema thelbësore si: roli transformues i edukimit për të nxitur modele të qëndrueshme; shembuj nga praktikat ndërkombëtare dhe aplikimi i tyre në kontekste lokale; angazhimi i diasporës për përshtatjen e përvojave globale në zhvillimin ekonomik të Shqipërisë.

Gjatë takimit u diskutua perspektiva ndërkombëtare mbi edukimin për ekonominë qarkulluese, duke theksuar rëndësinë e inovacionit të gjelbër dhe mendimit sistemik. Në këtë tryezë, ide dhe përvoja të ndryshme u kombinuan për të krijuar një bazë të fortë për bashkëpunime të ardhshme.