Në vazhdën e përmirësimit të proceseve teknologjike me një vëmendje të veçantë në komponentët mjedisorë dhe të lëndëve të para alternative, përfaqësuesit e kompanisë “Antea Cement” ftuan Drejtorin Ekzekutiv Adrian Bylyku dhe një grup ekspertësh të Agjencisë Kombëtare të Burimeve Natyrore për promovimin e një sistemi të ri, i cili shërben për përpunimin e mbetjeve hidrokarbure të ngurta dhe të lëngëta, duke synuar në reduktimin e ndotjes mjedisore dhe rritjen e gamës se materialeve të përdorura në prodhim.

Ky investim serioz në fushën e industrisë minerare po zbatohet me sukses nga shoqëria “Antea Cement” sha., shoqëri e cila është licensuar për tre karriera, dy për mineralin gur gëlqeror dhe një për mineralin  argjilë. Të dy këto minerale shërbejnë si lëndë e parë për prodhimin e çimentos, në këtë rast të markës “Titan”. Për prodhimin e çimentos është ndërtuar fabrika e çimentos në Burizanë, fabrikë që ka mbi tre vite që operon suksesshëm në tregun Shqiptar e atë rajonal.

Ekspertët e kompanisë prezantuan teknologjinë e zbatuar nëpërmjet këtij investimi, e cila konsiston në:

• Transportin e sigurtë të tokës apo ujërave të ndotur nga vendi ku është shkaktuar ndotja deri në repartin përkatës në fabrike, me kontenierë të mbyllur hermetikisht. Kjo mënyre e zeron ndotjen gjatë transportit.
• Shkarkimin e kontenierëve dhe zbrazjen e tyre në depozitat përkatëse të repartit të ri në mënyrë të mekanizuar.
• Përgatitjen dhe kontrollin e masës së ndotur për t’u bërë gati për pompim.
• Pompimin me pompë me piston të masës së ndotur në hyrje të furrës. Hidrokarburet që ajo ka digjen së bashku me lëndën djegëse që përdor vetë furra (qymyr të pluhurëzuar) kurse masa tjëter e ngurtë bashkohet me klinkerin e çimentos.

Tokat dhe ujrat e ndotura me hidrokarbure (naftë vergin, vajra lubrifikantë, vajra të përdorur, etj.) janë shumë problematike në zonat ku ndodhen vendburimet e nxjerrjes së naftës dhe përreth tyre, por edhe në zonat e tjera industriale ku ndotja me lubrifikantë është gjithnjë e mundshme, dhe pas këtyre katër hapave, ndotja eleminohet dhe asnjë mbeturinë nuk del nga procesi. Cikli i kalimit të materialit të ndotur në furrë zgjat rreth 45 minuta dhe ko zgjatje në kohë jep siguri në eleminimin e masës së ndotur.

Drejtori Ekzekutiv i AKBN Bylyku vlerësoi maksimalisht teknologjinë e aplikuar nga ky investitor në funksion të një perspektive më të mirë për zgjidhjen e problemit të ndotjeve në zonat e vendburimeve të naftës, sidomos në jug të vendit (Fier, Kuçove, Vlorë, etj.), por edhe në zonat e tjera industriale kudo në vendin tonë.