Drejtoria Minerare në AKBN, në datën 24 Nëntor 2021 organizoi një analizë të këtij sektori  me qëllim diskutimin  dhe zgjidhjen e disa  problematikave lidhur me rentën minerare. Analiza u krye në prani të Drejtorit Ekzekutiv të AKBN, ku të ftuar ishin edhe përfaqësues të  Drejtorive të tjera, si nga Drejtoria e Zhvillimit Strategjik dhe Dëgjesave me Publikun, (Koordinatorja e Bashkëqeverisjen për Biznesin në AKBN), dhe nga Drejtoria Ekonomike.

Nga Drejtoria Minerare u prezantua një analizë krahasuese e vlerës së rentës minerare aktualisht dhe propozime për disa ndryshime të kësaj vlere në të ardhmen. Kjo konsiston në saktësimin e vlerës së rentës minerare, sipas emërtimit të mineraleve që shfrytëzohen për të evituar diferencat aktuale në vlerat e paguara për të njëjtin mineral.

Drejtori i Drejtorisë Minerare vuri në dukje se ka disa mospërputhje ndërmjet Ligjit të  Tatim Taksave Kombëtare me Ligjin Minerar aktual, për shkak të emërtimeve të mineraleve që shfrytëzohen dhe kategorizimit të tyre me çmime të ndryshme.

Drejtori Ekzekutiv kërkoi që të ripërcaktohen dhe riklasifikohen disa nga emërtimet e mineraleve metalore dhe jometalorë në bazë të lejeve minerare të shfrytëzimit, me qëllim unifikimin e pagesës së rentës minerare për minerale të njëjtë. Kjo iniciativë në emërtimin e mineraleve metalorë dhe jo metalorë të çohet përpara në bashkëpunim të ngushtë  me Shërbimin Gjoelogjik Shqiptar.

Gjithashtu u analizua dhe mundësia që një pjesë e ndryshimeve të rentës minerare të shërbejë si fond financiar për të garantuar efikasitetin e aktivitetit të mëtejshëm të AKBN në të ardhmen, duke u bazuar në monitorimet që i bëhen çdo leje minerare.​