Departamenti Amerikan i Shtetit dhe Deloitte Financial Advisory Services lançuan fazën e dytë të programit të asistencës teknike për sektorin hidrokarbur në AKBN. Ky program i financuar nga Departamenti Amerikan i Shtetit, Byroja e Burimeve të Energjisë (ENR), ka si objektiv të përgjithshëm mbështetjen e AKBN-së nëpërmjet forcimit të kapaciteteve teknike dhe profesionale në fushën e hidrokarbureve. Kjo fazë e projektit do të vijojë përgjatë vitit 2020 dhe do të fokusohet në:

– Përpunimin, interpretimin e të dhënave dhe analizimin e faktorëve ekonomikë të blloqeve;

– Analizimin e të dhënave dhe aplikimin e praktikave më të mira në operacionet e kërkimit dhe prodhimit;

– Organizimin e raundeve konkuruese të liçensimit për blloqet e lira.

Në takimin e zhvilluar me rastin e prezantimit të këtij programi, Drejtori Ekzekutiv i AKBN-së, Z. Adrian Bylyku falenderoi përfaqësuesin e Byrosë së Burimeve të Energjisë Z. Evan McGlaughlin, dhe përfaqësuesin e kompanisë Deloitte Z. Wayne Smith, Drejtues i projektit, i pranishëm në takim, si dhe të gjithë expertët për asistencën mjaft të vyer që vazhdojnë t’i japin stafit të AKBN-së duke ndikuar drejtpërsëdrejti në rritjen e përformancës së institucionit. Në fjalën e tij Z. Bylyku inkurajoi stafin e AKBN-së që të përfitojë maksimalisht nga kjo mundësi e jashtëzakonshme që do t’i shërbejë perspektivës së tyre profesionale, të AKBN-së, por edhe të institucioneve të Qeverisë Shqipëtare në tërësi.