Shkëmbimi i informacionit dhe ecuria e projektit Aquanex ku AKBN është tashmë përfituese ishte synimi i takimit informues të zhvilluar ditën e sotme në AKBN me pjesëmarrjen e drejtorëve dhe stafit. Takimi është në vazhdën e takimeve që AKBN zhvillon herë pas here për njohjen me projektet që po zbatohen dhe AKBN është përfituese. Në fillim të takimit Drejtori Ekzekutiv Z. Bylyku, bëri një parantezë të rëndësisë së përfshirjes dhe përfitimit direkt të AKBN nga këto projekte. Ai theksoi posaçërisht rolin dhe angazhimin që duhet të ketë stafi i AKBN-së në të gjitha nivelet në marrjen e informacioneve dhe kategorizimin e mundësive për të përfituar nga projektet e financuara nga Bashkimi Evropian, nëpërmjet nismave rajonale dhe më gjërë. Z. Bylyku vlerësoi aplikimet e bëra dhe projektet e përfituara nga AKBN/Drejtoria e Energjive të Rinovueshme, nëpërmjet të cilave do të sigurohen trajnime të cilat do të ngrenë nivelin e ekspertizës së AKBN-së në fushën e menaxhimit të burimeve natyrore, si dhe nënvizoi se projeket LED dhe Aquanex kanë një pafundësi mundësish për përfitim për rritjen e kapaciteteve të burimeve njerëzore të AKBN, si institucioni teknik më eficent, më konkret, dhe më me experiencë në vend.
Projekti zbatohet në dy zona në Gjirokastër dhe Përmet dhe synon të vlerësojë potencialin energjetik të dy lumenjve Vjosës dhe Drinos dhe mënyrën se si mund të shfrytëzohen ato për burim energjie. Gjithashtu projekti do të evidentojë dhe problematikat në lidhje me mjedisin. Në këtë projekt janë përfitues AKBN në bashkëpunim me Ministrinë e Mjedisit. Roli i AKBN është në dhënien e informacionit nga pikëpamja energjetike në vite për këto dy lumenj, prurjet dhe të dhënat meteorologjike që impaktojnë në to.
Takime të ngjashme do të zhvillohen në vijimësi për të ndarë infomacionin për ecurinë e këtyre projekteve dhe të atyre që do të përfitohen në të ardhmen.