Agjencia Kombëtare e Burimeve Natyrore ishte pjesë e takimit të Ekspertëve për Energjinë e Rinovueshme i organizuar nga Zyra Ekonomike e Kombeve të Bashkuara për Europën (UNECE) në Gjenevë (Zvicër), në datat 5-8 Tetor 2021.
Agjencia Kombëtare e Burimeve të Rinovueshme ka një rol të rëndësishëm në këtë institucion ndërkombëtar, ku Drejtori Ekzekutiv i AKBN, z. Adrian Bylyku është Nënkryetar i Byrosë së Grupit të Ekspertëve për Energjitë e Rinovueshme (GERE).Gjatë fjalës së mbajtur në këtë event, Z. Bylyku prezantoi temën “ Zhvillimi i burimeve të rinovueshme si dhe rekomandimet e takimit, integrimi dhe harmonizimi i burimeve të rinovueshme në rrjetin energjetik shqiptar”. Ai e vuri theksin tek rekomandimet e takimit me Kombet e Bashkuara në datat 6-7 Korrik 2021 në Tiranë si dhe zhvillimin e investimeve të burimeve të rinovueshme në Shqipëri. Në vijim, kreu i AKBN diskutoi mbi bashkëpunimin rajonal dhe rolin e Komitetit Drejtues në Organizatën e Kombeve te Bashkuara, për një zhvillim të qëndrueshëm energjetik në mbrojtje të ndryshimeve klimaterike.
Takimi i Ekspertëve për Energjinë e Rinovueshme u organizua në kuadrin e Programit 21 të Komitetit për Energjinë e Qëndrueshme.