Në kuadër të Projektit “Blue Deal” në datat 23, 24 dhe 25 Mars në Valencia u zhvillua Forumi i Biznesit, me pjesëmarrjen e partnerëve të projektit dhe përfaqësues të ndërmarrjeve të sektorit të energjisë.Agjencia Kombëtare e Burimeve Natyrore, si partnere e Projektit “Blue Energy”, u përfaqësua nga Z. Adrian Bylyku , Drejtor  Ekzekutiv dhe Z. Artan Leskoviku , Drejtor i Energjive të Rinovueshme.

Forumi i Biznesit i Valencias kishte për qëllim transmetimin e informacioneve dhe infrastrukturave të nevojshme të “BLUE DEAL” te palët private të interesuara, në nxitjen e ndërveprimeve të tyre dhe në krijimin e partneriteteve konkrete për zbatimin e projekteve të BE-së.

Gjatë eventit, ndërmarrjet e energjisë dhe organizatat e përfshira në zinxhirin e vlerave të ekonomisë së energjisë blu, shfrytëzuan mundësinë të takohen përmes platformës online duke prezantuar projektet e tyre në shfrytëzimin e energjisë së detit.

Gjatë ditës së parë, u prezantua “Protokolli i Transferimit të Marrëveshjes Blu”, statusi i ekonomisë blu dhe u diskutua gjithashtu roli i energjive të rinovueshme detare në nivel lokal, kombëtar dhe ndërkombëtar. Disa kompani patën mundësinë të ndajnë me të pranishmit shembujt e tyre të praktikave më të mira dhe të zbulojnë mënyrën se si mund të financojnë projektet e tyre të energjisë blu.

Dita e dytë iu kushtua kompanive inovative që kanë marrë pjesë në sfidën e hapur të inovacionit dhe kanë paraqitur propozimet e tyre. Pasdite u zhvillua seanca me investitorët, të cilët kishin paraqitur projektet më të mira për shfrytëzimin e energjisë së detit.

Dita e tretë iu dedikua prezantimit të “Aleancës Rajonale”, “Planit të Përbashkët për Shfrytëzimin e Energjisë së Detit”, dhe u prezantua qartë se si testohen përputhshmëritë në terren duke përdorur realitetin virtual dhe disa udhëzime të vlerësimit mjedisor.

Gjatë gjithë evenimentit pjesëmarrësit patën mundësi për takime ndërmjet kompanive ku mund të ndërveprohej nëpërmjet instrumentit virtual të krijuar nga projekti, për të vizualizuar mënyrën se si do të dukej objekti në terren pas zbatimit të energjive të rinovueshme në zonat bregdetare.